អចលន​ទ្រព្យ

កម្ពុជា​គ្រោងប្រែក្លាយខេត្តព្រះសីហនុដូចទីក្រុងចិន ខណៈអ្នកជំនាញសង្កត់ធ្ងន់ទៅខេត្តកំពង់ស្ពឺ

រាជរដ្ឋាភិបាលកម្ពុជាបានដាក់ចេញផែនការប្រែក្លាយខេត្តព្រះសីហនុទាំងស្រុងទៅជាតំបន់ឧស្សាហកម្មគំរូរបស់ប្រទេសកម្ពុជា ដោយយកលំនាំតាមតំបន់សេដ្ឋកិច្ចពិសេស Shenzhen ប្រទេសចិន។

លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា(CDC) ធ្លាប់បានលើកឡើងថា រាជរដ្ឋាភិបាលមានបំណងចង់ប្រែក្លាយ ខេត្តព្រះសីហនុទាំងស្រុងជាតំបន់សេដ្ឋកិច្ឋពិសេសដូចនឹងតំបន់សេដ្ឋកិច្ចពិសេសនៅទីក្រុង Shenzhen ប្រទេសចិន និងជំរុញដល់ តំបន់សេដ្ឋកិច្ចពិសេសខេត្តព្រះសីហនុឲ្យក្លាយជាក្បាលម៉ាស៊ីនដែលអាចអូសទាញ កំណើនសេដ្ឋកិច្ចកម្ពុជាបានឆាប់រហ័ស។

យ៉ាងណាមិញ លោក គីម ហ៊ាង ប្រធានសមាគមន៍អ្នកវាយតម្លៃ និងភ្នាក់ងារអចលនវត្ថុបានចែករំលែកនៅក្នុងបណ្តាញសង្គមហ្វេសប៊ុករបស់លោកដោយបានលើកឡើងថា “ វានឹងក្លាយទៅជាកំហុសដ៍ធំមួយ​បើយកខេត្តព្រះសីហនុ ទៅអភិវឌ្ឍន៍ទៅជាតំបន់ឧស្សាហកម្មដូចនៅ Shenzhen របស់ប្រទេសចិន ក្នុងរយ:ពេល ២០ ទៅ ៣០ ឆ្នាំខាងមុខទៀត។ ខេត្តព្រះសីហនុកើតមកដើម្បីក្លាយទៅជាតំបន់ទេសចរណ៍លំដាប់លេខ ១ នៅអាស៊ាន និងលើពិភពលោក ហើយខេត្តដែលល្អបំផុតសម្រាប់ការអភិវឌ្ឍន៍ទៅជាតំបន់ឧស្សាហកម្ម ដូចនៅ Shenzhen របស់ប្រទេសចិន គឺខេត្តកំពង់ស្ពឺ សណ្ឋានដី ទីតាំងភូមិសាស្ត្រ និងលក្ខណ:អំណោយផលពីធម្មជាតិរបស់ខេត្តទាំងពីរពិតជាបានបង្ហាញច្បាស់ហើយថា អ្វីដែលគួរធ្វើ និងអ្វីមិនគួរធ្វើ។” នេះបើយោងតាមគេហទំព័រហ្វេសប៊ុករបស់លោក Kim Heang។

គួរបញ្ជាក់ផងដែរថា បច្ចុប្បន្នខេត្តព្រះសីហនុបាននឹងកំពុងទាក់ទាញវិនិយោគិនជាច្រើន ពិសេសវិនិយោគិនចិន ជាមួយនឹងគម្រោងអភិវឌ្ឍធំៗលើសសណ្ឋាគារ ខុនដូ ផ្សារទំនើប ជាដើម ហើយអ្វីដែលគួរឲ្យកត់សម្គាល់នោះតម្លៃអចលនទ្រព្យនៅខេត្តព្រះសីហនុ ពិសេសតំបន់ឆ្នេរបានហក់ឡើងទ្វេដងដោយស្ថិតក្នុងរង្វង់ពី ៥៥០ ដុល្លារអាមេរិកក្នុង ១ ម៉ែត្រការ៉េ ទៅ ១៣០០ ដុល្លារអាមេរិកក្នុង ១ ម៉ែត្រការ៉េ៕

មតិយោបល់