អចលន​ទ្រព្យ

១០ ឆ្នាំខាងមុខវិស័យអចលនទ្រព្យនៅកម្ពុជា នឹងទៅជាយ៉ាងណា?

ទីផ្សារអចលនវត្ថុកម្ពុជានៅតែបន្តមានសន្ទុះកើនឡើង ជាពិសេសគឺកំណើននៅក្នុងទីផ្សារលំនៅឋានប្រភេទបុរី និងអគារសហកម្មសិទ្ធិ ដែល កំណើននៅក្នុងវិស័យនេះ​ បានរួមចំណែកយ៉ាងសកម្មនៅក្នុងការជំរុញកំណើនសេដ្ឋកិច្ចកម្ពុជា។

យ៉ាងណាមិញបើតាមការប្រមើមើលអំពីវិស័យអចលនទ្រព្យនៅក្នុងអំឡុងពេល ១០ ឆ្នាំខាងមុខតាមរយ:កិច្ចពិភាក្សារវាងអ្នកជំនាញអចលនទ្រព្យ ក្នុងកម្មវិធី “សន្និបាត និងពិព័រណ៍អចលនទ្រព្យនៅកម្ពុជាក្នុងឆ្នាំ ២០១៧” ក្រោមប្រធានបទ “លំនៅដ្ឋាន ខុនដូ និងតំបន់សេដ្ឋកិច្ចពិសេស” ដោយមានការចូលរួមអំពីសំណាក់វាគ្មិន និងជាអគ្គនាយកក្រុមហ៊ុនអចលនទ្រព្យ ៣ រូបបានបង្ហាញទស្សន:ថា៖

លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា និងជាអគ្គនាយកក្រុមហ៊ុនបុរីវិមានភ្នំពេញថ្មី បានមានប្រសាសន៍ថា “បើសិនជាកម្ពុជានៅតែបន្តរក្សាសន្តិភាព ស្ថេរភាពនយោបាយ ម៉ាក្រូសេដ្ឋកិច្ចដូចសព្វថ្ងៃដូចច្នេះនៅរយ: ១០ ឆ្នាំខាងមុខទៀតលំនៅដ្ឋាននៅតែត្រូវការជាចាំបាច់ និងនៅតែមានកំណើនរហូត”។

លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge LandGroup បានឲ្យដឹងថា​ “លោកនៅតែមានសុទិដ្ឋិនិយមចំពោះទីផ្សារអចលនទ្រព្យដោយសារក្រុមហ៊ុនរបស់លោកមានចំនុចពិសេស បី គឺទី១ Lifestyle, ទី២ ដៃគូល្អ និងទី៣ ភាពជឿជាក់របស់អតិថិជន។ ចំណែកនាពេលអនាគតចំពោះអ្នកអភិវឌ្ឍដែលមានចំណេះ ជំនាញ ក៏ដូចជាបទពិសោធន៍ពិតប្រាកដនឹងទទួលបានជោគជ័យ”។

លោកជំទាវឧកញ៉ា លឹម ឈីវហួ អគ្គនាយិកាក្រុមហ៊ុន Attwood Group បា​នមានប្រសាសន៍ថា “១០ឆ្នាំទៅមុខអចលនទ្រព្យនៅតែបន្តកើនឡើងទៀត ពុំទាន់មានការធ្លាក់ចុះនៅឡើយនោះទេ ហើយប្រសិនបើប្រទេសចិន ទម្លាក់អ្នកវិនិយោគរបស់ខ្លួនតែបន្តិច នោះប្រជាជនខ្មែរ និងមានជីវភាពធូរធាគ្រប់គ្នា”។​

គួរបញ្ជាក់ផងដែរថា បន្ទាប់ពីវិបត្តិសេដ្ឋកិច្ចសកលបានបញ្ចប់ សេដ្ឋកិច្ចកម្ពុជា នៅតែបន្តរក្សាកំណើនជាមធ្យម ៧ ភាគរយ ចាប់តាំងពីឆ្នាំ ២០១១ មកទល់នឹងឆ្នាំ ២០១៦នេះ ហើយកម្ពុជាយើងនៅតែរក្សាបានកំណើនសេដ្ឋកិច្ចដ៏រឹងមាំ ក្នុងអត្រា ៧ ភាគរយមកទល់នឹងឆ្នាំ ២០១៧នេះផងដែរ៕

 

 

មតិយោបល់