កាលពីពេលថ្មីៗនេះ ក្រុមហ៊ុន បុរី ប៉េង ហួត គ្រុប បានធ្វើពិធីបញ្ចុះបឋមសិលា បើកការដ្ឋានសាងសង់ជាផ្លូវការ ផ្សារទំនើប PH Diamond Place ក្រោមអធិបតីភាព ឯកឧត្តម ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្មនិងសំណង់។
ផ្សារទំនើបថ្មីនេះ គ្រោងចំណាយដើមទុនវិនិយោគប្រមាណជាង ៦០លានដុល្លារអាមេរិក ដែលមានទីតាំងស្ថិតនៅតាមបណ្តោយផ្លូវសម្តេចតេជោ ៦០ម៉ែត្រ ភាគខាងត្បូងរាជធានីភ្នំពេញ។
PH Diamond Place ត្រូវបានសាងសង់ឡើងលើ ផ្ទៃដីជិត ៦ហិកតា ដែលអាចចតរថយន្តបាន ២៦០០គ្រឿង និងម៉ូតូជិត ១ពាន់គ្រឿង ហើយគ្រោងបញ្ចប់គម្រោងទាំងស្រុងនៅឆ្នាំ ២០២០។
គម្រោងផ្សារទំនើប PH Diamond ស្ថិតនៅក្នុង គម្រោងដឹស្តាដាយមិន ជាគម្រោងមួយដែលធ្វើឲ្យតំបន់នេះ ប្រែក្លាយជាទីប្រជុំជនដ៏កុះករ ងាយស្រួលដល់ការរស់នៅ និងការប្រកបអាជីវកម្មផ្សេងៗ។
ស្ថាបត្យកម្មនៃផ្សារទំនើប នឹងប្រមូលផ្តុំទៅដោយហាងទំនិញជាច្រើនប្រភេទ រោងកុន សាលតាំងពិព័រណ៍ អាហារដ្ឋាន និងមជ្ឈមណ្ឌលកម្សាន្តនេះ នឹងសាងសង់ឡើងតាមលក្ខណ:បច្ចេកទេសទំនើបអមដោយសួនធម្មជាតិស្រស់បំព្រងទាំងក្នុង និងខាងក្រៅ ដែលមិនធ្លាប់មានផ្សារទំនើបណាមួយរៀបចំបែបនេះឡើយនៅប្រទេសកម្ពុជាយើង។
ភាពឥតខ្ចោះនៃផ្សារទំនើប PH Diamond Place គឺនៅជាន់ខាងលើបង្អស់ នឹងមានភោជនីយដ្ឋានបើកចំហសម្រាប់អង្គុយលម្ហែកាយ ស្រូបខ្យល់បរិសុទ្ធ គយគន់សួនធម្មជាតិពណ៌បៃតងខ្ចី និងទឹកជ្រោះសិប្បនិម្មិត ដែលធានាបន្ធូរភាពតានតឹង និងផ្តល់អារម្មណ៍ស្រស់ស្រាយដល់អតិថិជន។
ជាក់ស្តែងដោយផ្តោតសំខាន់ទៅលើភាពងាយស្រួលនៃការរស់នៅ បុរី ប៉េង ហួត គ្រុបក៏បានរៀបចំ ហេដ្ឋារចនាសម្ព័ន្ធ ក្នុងគម្រោងទាំងមូល សុទ្ធតែបានតភ្ជាប់ពីមហាវិថីសម្តេច តេជោ ហ៊ុន សែន និងផ្លូវជាតិលេខ២ និងលេខ៣ ឆ្លងកាត់ ព្រមទាំងជាបណ្តុំនៃទីប្រជុំជន ដែលមានវិនិយោគិនធំៗជាច្រើន ដូចជាក្រុមហ៊ុន Star Auto Cambodia (Marcedes-Benz)ជាដើម ហើយក៏មានសាលាអន្តរជាតិនៅក្បែរនោះផងដែរ។
គួរជម្រាបថា គម្រោងបុរី ប៉េង ហួត ដឹស្តាដាយមិន គ្របដណ្តប់លើវិសាលភាពផ្ទៃដីប្រមាណជាង ៤០ហិចតា ជាគម្រោងប្រកបដោយ ប្រណិតភាព នឹង ភាពស៊ីវីល័យនៃការរស់នៅ ព្រមទាំងមានទីតាំងនៅតាមបណ្តោយផ្លូវ មហាវិថីសម្តេចតេជោ ហ៊ុន សែន (៦០ ម៉ែត្រ) ដ៏មានសក្តានុពលក្នុងតំបន់ពាណិជ្ជកម្ម៕
មតិយោបល់