Post News Media ព័ត៌មានកីឡា វេស្ទើនភ្នំពេ...

វេស្ទើនភ្នំពេញ អាចនឹងយកគំរូរតាម អគ្គិសនីកម្ពុជា នារដូវកាលថ្មីនេះ

ក្រោយពីបានជ្រើសរើសកីឡារដែលបានចូលរួមធ្វើតេស្តសមត្ថភាព ជាច្រើននាក់ហើយក្លិប វេស្ទើនភ្នំពេញ ក៏បានធ្វើការប្រកួតមិត្តភាពលើកដំបូង ជាមួយ អង្គរថាយហ្គឺរ ដោយលទ្ធផលចាញ់ភ្ញៀវ ៥ ទល់ ១ កាលពីថ្ងៃទី ០៨ កុម្ភ: កន្លងទៅ ខណ:លោក ប៊ួយ ម៉េងហុង ថានឹងអាចមិនយកកីឡាករបរទេស ដូចក្លិបអគ្គិសនីកម្ពុជាដែរ។

យោងតាមសម្តីលោក ប៊ួយ ម៉េងហុង ដែលជាអ្នកចាត់ការទូទៅរបស់ក្លិប វេស្ទើនភ្នំពេញ បាននិយាយ៖​ «នៅក្នុងរដូវកាលថ្មី យើងនឹងចាប់ផ្តើមសារជាថ្មី ជាមួយមនុស្សថ្មី ចិត្តគំនិតថ្មី ហើយចំពោះកីឡាករបរទេសវិញ អាចនឹងមិនមាន ពីព្រោះក្លិបនឹងផ្តោតទៅលើ ពានរង្វាន់សម្តេច ហ៊ុន សែន (Hun Sen Cup) នឹងពានរង្វាន់សកលវិទ្យាល័យ ខ្លាំងជាង ក្របខ័ណ្ឌកំពូលកម្ពុជា រដូវកាល ២០១៨»។ អ្នកចាត់ការវ័យក្មេងរូបនេះ បានបន្ថែមថា លោកនឹងរៀបចំក្លិបមួយនេះដោយខ្លួនឯងផ្ទាល់ ហើយបានបញ្ជាក់ពីកីឡាករបរទេសថា មិនទាន់ប្រាកដ ១០០% នៅឡើយទេ តែនឹងដឹងច្បាស់នៅថ្ងៃទី ២០ ខាងមុខនេះ។

សូមបញ្ជាក់ផងដែរថា វេស្ទើនភ្នំពេញ នឹងធ្វើការប្រកួតមិត្តភាពជាមួយ ណាហ្គាវើល នាថ្ងៃទី ១០ ខែ កុម្ភ: នេះនាវេលាម៉ោង ៤ រសៀល លើទីលានកីឡដ្ឋានវេស្ទើន ដើម្បីស្ទៀបស្ទង់សមត្ថភាពកីឡាករថ្មីទាំងអស់នេះ៕

Loading...