ការចាប់ផ្តើមនៅ Premier League រដូវកាលនេះ របស់កីឡាករអេហ្ស៊ីប Mohamed Salah ពិតជាល្អខ្លាំងណាស់ ដោយកីឡាកររូបនេះ កំពុងតែប្រជែង​យ៉ាងខ្លាំងដើម្បីដណ្តើមយកស្បែកជើងមាស Premier League ជាមួយម្ចាស់ស្បែកជើងមាស ២រដូវកាលជាប់គ្នា Harry Kane ។

គិតត្រឹមសប្តាហ៍នេះ កីឡាករ២រូបនៅ Premier League រួមមាន Harry Kane និង Mohamed Salah កំពុងតែឈរកំពូលតារាង អ្នកស៊ុតបញ្ចូលទីច្រើនជាង​គេបំផុតក្នុងក្របខ័ណ្ឌកំពូលអង់គ្លេសមួយនេះ។ ក្នុងនោះដែរ Salah ពិតជាធ្វើបានល្អខ្លាំងណាស់ ដោយការស៊ុត១គ្រាប់ យប់មិញនេះ បានធ្វើឲ្យគ្រាប់បាល់របស់ Salah តាមទាន់ Harry Kane ពោលស៊ុតបាន ២៣ គ្រាប់ស្មើគ្នា។ បើទោះបីជា Kane ត្រូវប្រកួត ១ ប្រកួតយប់នេះក៍ដោយ តែមិន​ប្រាកដថា អាចស៊ុតនាំមុខលើ Salah វិញឡើយ ព្រោះការប្រកួតមិនងាយស្រួល​ក្នុងការរកគ្រាប់បាល់បញ្ចូលទីឡើយ។ យ៉ាងណាវិញ Mohamed Salah នៅតែរំពឹងថា រូបគេអាចប្រជែងឈ្នះ Harry Kane រដូវកាលនេះ ដើម្បីដណ្តើមយកស្បែកជើងមាស ដោយសារតែ កីឡាករអេហ្ស៊ីបរូបនេះ មិនដលខកខានរកគ្រាប់បាល់ឡើយ នៅមួយរយ:ចុងក្រោយនេះ។

Salah បានផ្លាស់ពី Roma មក Liverpool កាលពីរដូវក្តៅកន្លងមក ក្នុងតម្លៃជាង ៣០ លានផោនប៉ុណ្ណោះ ក៍ប៉ុន្តែ បើនិយាយពីសមទ្ធិផលវិញ Salah ធ្វើបានល្អជាង កីឡាករដែលមានតម្លៃថ្លៃដូចជា Alvaro Morata ផ្ទេរពី Real Madrid មក Chelsea និង Romelu Lukaku ផ្ទេរពី Everton ទៅ Man Utd ផងដែរ។