នៅក្នុងការប្រកួតពានរង្វាន់ King Cup ឆ្នាំនេះ ម្ចាស់ផ្ទះថៃ នឹងជួបជម្រើសជាតិ ហ្គាបុង (Gabon) ដែលមានកីឡាករឆ្នើម Aubameyang, ស្លូវ៉ាគី (Hamsik) និងអារ៉ាប់រួម។

ក្រុមការពារជើងឯក(ថៃ) នឹងលេងជាមួយ ហ្គាបុង នៅថ្ងៃទី ២២ ខែមីនា ស្របពេលដែលក្រុម ស្លូវ៉ាគី និង អារ៉ាប់រួម ត្រូវប្រកួតគ្នានៅថ្ងៃដដែល។ ការប្រកួតវគ្គផ្តាច់ព្រ័ត្រនឹងប្រព្រឹត្តទៅនៅថ្ងៃទី ២៥ ខែមីនា វេលាម៉ោង ៧:៣០ នាទីល្ងាច ខណ:ដែលការប្រកួតដណ្តើមលេខ៣ នឹងប្រព្រឹត្តទៅនៅម៉ោង ៤:៣០ រសៀល។

ក្រុមដែលត្រូវចូលរួមក្នុងព្រឹត្រិ្តការណ៍នេះ ត្រូវបានប្រកាសកាលពីថ្ងៃព្រហស្បតិ៍សប្តាហ៍មុន ដែលមានខ្សែប្រយុទ្ធលំដាប់ពិភពលោក ដូចជាកីឡាករ Pierre-Emerick Aubameyang របស់ក្រុម Arsenal ខ្សែប្រយុទ្ធ Marek Hamsik របស់ក្លិប Napoli និងអតីតកីឡាករ Martin Skrtel របស់ ស្លូវ៉ាគី នឹងត្រូវបង្ហាញខ្លួននៅប្រទេសថៃ។

ទន្ទឹមនឹងនេះដែរអារ៉ាប់រួម នឹងដាក់កីឡាករខ្លាំងបំផុតរបស់ពួកគេដែលអាចធ្វើទៅបាន ដែលដឹកនាំដោយអតីតកីឡាករល្អបំផុតនៅអាស៊ីប្រចាំឆ្នាំ រួមមាន Omar Abdulrahman និង Ahmed Khalil ។

ប៉ុន្តែម្ចាស់ផ្ទះថៃ ក៏មិនអន់ដែរ ព្រោះជាក្រុមការពារពានរង្វាន់នេះ នឹងបានកោះហៅអ្នកចាំទី Kawin Thamsatchanan (OH Leuven បែលហ្ស៊ិក) និងកីឡាករលេងនៅ J1 League ប្រទេសជប៉ុន Teerasil Dangda (Sanfrecce Hiroshima), Theerathon Bunmathan (Vissel Kobe) និង Chanathip Songkrasin (Consadole Sapporo) សម្រាប់ការប្រកួតនេះ៕